Boas prácticas ambientais en turismo pesqueiro

Presentouse no CEIDA o libro Manual de Buenas Prácticas Ambientales en Turismo Pesquero, feito pola Sociedad Española de Ornitología (SEO/BirdLife). O libro, que se pode descargar gratuitamente, está dirixido aos profesionais do mar pero pode ser de interese para moitas outras persoas (técnicos de turismo, empresas relacionadas co turismo, técnicos de medio ambiente, turistas, etc.). O obxectivo do libro é proporcionar coñecemento, propoñer ideas e reflexións e buscar vías para promover o turismo pesqueiro, poñendo o acento na aposta do sector pola sostibilidade ambiental.

De «ganchete» con Urbano Lugrís e Antón Avilés de Taramancos

Dentro da ruta «Da Gaiteira a Monte-Alto. A viaxe ao Gran Sol sen saír da Coruña», Xurxo Souto recala este xoves 18 de decembro, ás 20 h na librería Nova Colón ( San Andrés, 112) cos seus «Contos do Mar de Irlanda».

Nesta cita para reencontrármonos co talento submarino de Urbano Lugrís e Antón Avilés de Taramancos. Parella prodixiosa cuxa presenza iluminou nos anos cincuenta estas rúas do centro da cidade ( o poeta Antón Avilés residía nunha pensión na praza de Santa Catarina, Urbano Lugrís na propia rúa de San Andrés).

Este acto quere ser tamén un adianto dos fastos do V Día Lugrís que se desenvolverá o vindeiro sábado, promovido por In Nave Civitas, Asociación O Mural e AELG, e que deixará como pegada gráfica, na veciña praza de Sellier, unha gran reprodución de dúas obras do propio pintor Urbano.

CORUÑA, catro temas. Libro

O vindeiro luns 15 de decembro ás 18:00 h vaise presentar no CGAI o libro de fotografías de Francisco Pillado, CORUÑA, catro temas.

Francisco Pillado González foi un fotógrafo afeccionado da Coruña, nado en 1892 e morto en 1977, e que foi un dos fundadores da Sociedade Fotográfica da Coruña. Este libro que mostra o seu traballo foi editado polos seus netos e netas. A selección e ordenación das máis de 100 fotografías publicadas no libro correu a cargo de José Caruncho, autor tamén do texto introductorio que aparece en galego, español e inglés.

O libro ten catro seccións: A cidade, os arcos, o porto, as persoas. A sección adicada ao porto consta de 35 fotografías que recollen imaxes de mediados do século XX relacionadas co mar. Parte das imaxes son propriamente de porto da Coruña pero algunhas son da praia de Riazor aínda que todas mostran actividades relacionadas coa pesca.

As fotografías de Pillado non só teñen unha grande calidade, teñen ademais un alto valor documental no referido ao mundo do mar. Nas publicadas no libro podemos ver unha variada tipoloxía de pequenas embarcacións do norte. Tamén aparecen: tripulacións comendo abordo, un mediomundo, mariñeiros encarnando o palangre, redeiros, pataches e balandros, pescadores de cana, pequenas motoras, e incluso mariscadores na dársena.

Parabéns á familia Pillado por ter rescatado para todos o magnífico traballo do seu avó e o noso agradecemento polo permiso para usar a fotografía de arriba.

Marcados para sobrevivir. Documental

O vindeiro venres 12 de decembro ás 18:30 h na sede da Federación Provincial de Confrarías en Arcade e o xoves 18 de decembro ás 18:00 h, no Museo da Fábrica de Salga do Grove, en Punta Moreiras, vaise presentar o documental Marcados para sobrevivir, segunda entrega da serie «O Mar da Fin do Mundo» de José Irisarri.

Este acto, que ten como obxectivo achegar ao público a importancia do coñecemento científico para a correcta xestión dos recursos pesqueiros, está promovido polo Centro Tecnolóxico do Mar-Fundación CETMAR, La Caixa, a Federación Provincial de Confrarías de Pontevedra e o Grupo de Acción Costeira Ría de Arousa.

A longametraxe presenta impactantes imaxes submarinas das rías galegas para divulgar o labor "serio e metódico" dos científicos que investigan para establecer unhas normas de explotación racionais. Mostra os avances realizados nos últimos anos no estudio dos lábridos, raias mariñas e centolas na costa galega, así como de tiburóns peláxicos no Océano Atlántico mediante a marcaxe e seguimento de exemplares destas especies.

A proxección será o punto de partida para crear un espazo de comunicación directa entre investigadores, xestores, pescadores e todo o público asistente, a través dun coloquio co equipo responsable deste documental, Jose Irisarri (Producción e imaxe submarina) e Manuel E. Garci (Imaxe submarina)

A entrada é gratuíta pero o aforo é limitado, polo que os interesados en asistir deberán confirmar a reserva de praza co CETMAR (aval@cetmar.org ou chamando ao teléfono 986 247 047-Ext 309).

María Antonia, unha muller que lle deu nome a todo un mar


Dentro da ruta «Da Gaiteira a Monte-Alto. A viaxe ao Gran Sol, sen saír da Coruña», Xurxo Souto recala este xoves ás 20:00 h na libraría Couceiro na Coruña (Praza do Libro, 12) cos seus «Contos do Mar de Irlanda». Nesta cita para dar a coñecer entre os terrícolas a talasonimia das augas que rodean á Coruña, «o Mar de María Antonia», e honrar a memoria desta muller do barrio de Santa Lucía que lles deu nome. Haberá palabra, toque de cornas e acordeón.

«Dende o alto da Torre de Hércules -mar e horizonte- terrícolas e terrícolos enchemos o ollo cunha visión extraordinaria. Do cabo Prior, ou Prioiro, até as illas Sisargas. Exceso de océano ao que agora moitas veces lle din Artabria, e que os vellos patróns chaman Mar de María Antonia.»

A FGCMF apoia aos xeiteiros

A proposta do Parlamento e do Consello europeos de prohibir todas as redes de deriva pon en perigo ao xeito. Esta proposta nace dos abusos reiterados no uso das grandes redes de deriva industriais. O xeito é unha arte de deriva artesanal, usada desde hai máis de 600 anos nas rías, e que produce unha pesca moi selectiva, en tipo e tamaño do peixe capturado, e respectuosa coas aves e mamíferos mariños.

A FGCMF manifesta o seu apoio aos xeiteiros na súa reivindicación de que non se prohiba o xeito, de que se modifique a proposta para permitir o uso de desta rede de deriva artesanal. Son moitas as familias que dependen do xeito, para as que o xeito é o seu medio de vida. Nalgúns portos, como Rianxo, a flota dos xeiteiros é numerosa e supón unha porcentaxe moi alta. Non se entende que o estudo da costa atlántica no que se baseou a proposta non mencione o xeito, nin sequera a Galicia.

Estes días estiveron en Bruselas unha representación dos xeiteiros. Reuníronse con Hubert Gambs, director xeral de Asuntos Marítimos e Pesca da Comisión Europea, con Fabrizio Donatella, xefe da Unidade de Conservación e Control da Pesca, e con Alain Cadec, presidente da Comisión de Pesca do Parlamento. Desde as institucións parece que entenden o problema e hai boa disposición para buscar unha solución, pero o certo é que aínda non hai nada confirmado.

Os xeiteiros teñen unha longa historia de preitos e loitas polo seu dereito a pescar. No século XVI tiveron que enfrontar os grandes cercos que empezaron a usarse a finais do XV, no XVIII a chegada da xávega supuxo uns fortes enfrontamentos entre os xeiteiros e os fomentadores. E xa no cambio de século ente o XIX e o XX primeiro o enfrontamento foi coas traineras e logo coas tarrafas. Pese a todo, o xeito segue vivo.

Os principais argumentos para conservar o xeito deben ser os económicos, sociais e ambientais: é unha arte sostible, supón o medio de traballo de 427 barcos e é unha arte selectiva e respectuosa co medio. Pero hai tamén razóns culturais. O xeito dounos un importantísimo legado cultural. A lancha do xeito é un dos iconos do noso patrimonio marítimo e non haberá galego que non cantara algunha canción onde se fale do xeito. O xeito forma parte de nós.

Desexamos que esta situación teña unha boa solución e que finalmente os xeiteiros volvan pescar como levan facendo centos de anos.

(Imaxe: A representación dos xeiteiros diante do Parlamento Europeo. Praza pública)

Continúa a odisea do Bernardo Alfageme

Onte e hoxe veciños de Coia están facendo garda na rotonda do Alcalmpo en Vigo para que que non se poña nesa rotonda o Bernardo Alfageme. Diante da decisión do Alcalde de Vigo de situar o barco na rotonda (en contra da decisión do Pleno), os veciños decidiron en asemblea aberta que non queren o barco na rotonda e farán o posible para evitalo porque pensan que é un despilfarro, sobre todo cando hai familias no barrio que están pasando por situacións económicas moi difíciles. E tamén porque consideran que un elemento tan significativo do patrimonio marítimo industrial merece un lugar adecuado para que a cidadanía poida gozar del.

Temos falado do Bernardo Alfageme aquí anteriormente, sabemos da dificultade de atopar un destino acaido ao barco, pero situar un arrastreiro do ano 1944 nunha rotonda non parece unha forma adecuada de coidar, promover e socializar o patrimonio marítimo.

Pódese seguir en twitter o que pasa na rotonda no hashtag #NONaoBARCOnaROTONDAdeCOIA ou aquí

A noticia en: Faro de Vigo, La Voz de Galicia, VigoDixital

(Imaxe: Recreación da rotonda, Faro de Vigo)

Dúas novas asociacións entran na FGCMF

Na pasada asemblea pasaron a formar parte da FGCMF a Asociación Cultural Barcos do Nordés, de Redondela, e a Asociación Cultural de Embarcacións Tradicionais A Torre, de Cambados. Ámbas asociacións caracterízanse porque a maioría dos seus membros son xente moza. Alegrámonos moito de que así sexa, consideramos moi importante que se vaia incorporando ao mundo das embarcacións tradicionais xente nova que poida dar remuda como antes o fixeron outros.

A Asociación Cultural Barcos do Nordés, está traballando na recuperación dun galeón de máis de 10 m ao tempo que participa nos eventos no mar co Búrbida, un histórico da flota tradicional, que lles foi cedido en depósito polo seu armador.

E en Cambados, ou máis precisamente en San Tomé, a Asociación Cultural de Embarcacións Tradicionais A Torre, nos poucos anos que ten de vida xa participou en moitos eventos e este ano organizou a regata de dornas a remos da Valvanera. Contan con algunhas dornas, un bote de Ribadeo e dous loros, Caiño e Espadeiro. O loro é un tipo de chalana cunha fasquía característica, con menos arrufo e manga da normal, e que se empregaba na zona de Cambados para distintos tipos de traballos en zonas de pouco calado.

(Imaxe: os loros en San Tomé)

Actas do I Congreso Nacional de Arqueología Naútica y Subacuática Española

Ven de publicarse o libro das actas do I Congreso Nacional de Arqueología Naútica y Subacuática Española, organizado en Cartagena en 2013 polo Museo Nacional de Arqueología Subacuática(ARQUA).

Este volume de 1248 páxinas recolle as comunicacións do Congreso cuxo obxectivo era presentar a evolución e os logros da arqueoloxía náutica e subacuática en España. Quen siga os foros relacionados coa arqueoloxía subacuática saberá que a situación non é percibida polos seus protagonistas como boa, tanto no referido a financiamento como a organización e lexislación, pero a pesares diso nestas actas queda claro que sí hai moitas persoas que están a traballar neste sector ainda que nunhas condicións manifestamente mellorables.

Respecto da presenza da costa galega nas actas, abaixo copiamos os títulos que falan directamente dos xacementos galegos, pero o mar no ten lindes, e hai moitas outras comunicacións que lle serán de útilidade aos interesados na arqueoloxía subacuática en Galicia. En resumo, unha magnífica obra que nos dá unha pequena idea do enorme patrimonio somexido que nos rodea.

Estas son comunicacións relacionadas con Galicia:

Contos do mar de Irlanda. De Ribadeo a Pontevedra

Seguen as presentacións de Contos do mar de Irlanda, dun extremo ao outro do país.

O venres 28 ás 20:30 h Xurxo Souto estára no Amodiño TendaBar, en Ribadeo. Esta presentación está organizada pola Agrupación cultural Francisco Lanza.

E o sábado 29 ás 12:30 h en Pontevedra, na Libraría Paz, haberá un «vermú entre libros» no que Xurxo Souto estará acompañado polo periodista Serafín Alonso.

Distribuir contido

A Asemblea da FGCMF decidiu en votación que sexa Cabo da Cruz o porto que acolla o XII Encontro de...
Xa son públicos os materiais das pasadas xornadas Retos e oportunidades para as embarcacións...