Achégase o mal tempo

É tempo de poñer os barcos en terra. Ainda hai calor, moita para este tempo, pero pronto chegarán os temporais. Nos portos os colectivos da FGCMF traballan para deixar os seus barcos a cuberto. Na Illa de Arousa a ACD Dorna xa ten os barcos nos seus locais e o Rei do mar está no varadoiro para poñelo a punto. En Portonovo os Amigos da Dorna tamén están levando para terra os barcos. E máis ao norte os Patexeiros de Sada sacan os barcos do mar, non queren volver sofrer os problemas e danos que lles causaron os temporais o ano pasado.

Algúns barcos ainda quedan no mar, uns coa esperanza de ter un bo outono que permita navegar, e outros porque non lles queda outra, non todos os colectivos teñen espazo a cuberto en terra.

(Imaxe: Rei do mar, ACD Dorna)

Preocupación en Sueste polo futuro dos estaleiros de Carlagho e Casqueiro en Moaña

Non está claro que vai pasar cos estaleiros tradicionais de Moaña. Logo de que o Pleno de Moaña rexeitase o plan inicial que eliminaba o acceso ao mar dos estaleiros porque collía seis metros do seu terreo lindantes co mar, o Concello parece que decidíu seguir adiante co proxecto pero modificando o plan inicial, por un lado faríase por tramos para evitar a perda da subvención para a construción e por outro pretende seguir negociando cos propietarios dos estaleiros, quen xa se negaron por completo a renunciar a eses terreos, ao tempo que se solicitou a Costas que acepte a construción dunha pasarela de madeira sobre o mar cunha ponte que permita o acceso dos barcos aos estaleiros como se propoñía nun proxecto alternativo.

Os membros da Asociación Sueste están preocupados porque non hai información pública sobre o deseño exacto desa pasarela e porque, segundo publicou o Faro de Vigo, o Concello non desbota a posibilidade de pedir a caducidade da concesión do dominio marítimo-terrestre que teñen os donos dos estaleiros ata 2018, ou en todo caso agardar a esa data para levar adiante o plan inicial que elimina o acceso ao mar dos estaleiros. Diante desta situación Sueste solicitou unha reunión co Alcalde de Moaña e ainda non obtivo resposta.

Os estaleiros de Carlagho e Casqueiro son un importante patrimonio de Moaña. A súa desaparición suporía unha perda importante para os veciños de Moaña e para todos os amantes do patrimonio marítimo. As mesmas razóns que levaron á Xunta de Galicia a incluir no Inventario Xeral do Patrimonio Cultural de Galicia o Estaleiro da Banda do Rio (Purro) en Bueu son totalmente aplicables no caso de Moaña.

Desde a FGCMF esperamos que se chegue a unha solución que permita a construción do Paseo marítimo, cousa á que tamén Sueste e favorable, pero sempre respetando e poñendo en valor dous dos escasísimos estaleiros que quedan en pleno núcleo urbano en Galicia.

Noticias relacionadas no Faro de Vigo:

20.10.2014 Sueste lamenta que el Concello no les informe sobre el paseo de Seara y cómo afectará a los astilleros

28.09.2014 Sueste insiste en que el nuevo paseo de Seara ponga en valor los astilleros de Casqueiro y Carlagho.

17.09.2014 Moaña completará su paseo marítimo tras sellar la inversión de 450.000 euros de la Xunta

05.09.2014 El paseo de Seara sorteará los astilleros con una pasarela sobre el mar

16.09.2014 Ethel Vázquez y Rosa Quintana firman en Moaña el convenio del paseo de Seara

22.06.2014 Presentadas 8.000 firmas para que el Concello de Moaña ejecute el proyecto del paseo de Seara

09.06.2014 Vecinos de Moaña defienden en la calle la conservación de los astilleros tradicionales

(Imaxe: estaleiro de Carlagho, tomada de Sueste)

As pequenas bisquines de Cancale e St-Malo

No sitio web Histoire maritime de Bretagne Nord publicouse recentemente un artigo sobre Les petites bisquines de Cancale et de St-Malo (As pequenas bisquines de Cancale e St-Malo). Como sempre no caso deste sitio web o traballo é moi interesante e sobre todo ten unhas fermosas imaxes de finais do século XIX e principios do século XX. Recomendamos ver a versión en pdf porque as imaxes están a maior resolución.

As bisquines son barcos da zona norte da Bretaña que aparellaban velas ao terzo en dous ou tres paus. Actualmente hai dúas réplicas navegando, a Cancalaise e a Grandvillaise

A imaxe de arriba corresponde a unha bisquine de preto de 8 metros de eslora que navega cun ris collido. Chama a atención o parecido do aparello cos dos galeóns de Pontevedra debuxados por Monleón, dos que temos falado anteriormente.

Aberta unha petición pública de atraque en Vigo para o Hidria

Os armadores do Hidria abriron unha petición en Change.org para solicitar á Autoridade Portuaria de Vigo que lle facilite un atraque ao Hidria para poder traballar como barco museo e de pasaxeiros.

Mariñeiros, de José Suárez. Calendario

Está á venda o Calendario 2015 de Xerais, con 13 fotografías da serie Mariñeiros de José Suárez.

José Suárez está considerado o mellor fotógrafo galego do século XX. A serie Mariñeiros foi feita por Suárez arredor de 1936, pouco antes de que tivera que marchar ao exilio.

A imaxe de portada do Calendario foi tamén a imaxe do cartel do I Encontro de Embarcacións Tradicionais de Galicia.

Arde Rande. Conmemoración da Batalle de Rande

O sábado 18 de outubro a ADC Rande e o Meirande organizan Arde Rande, unha festa de conmemoración da Batalla de Rande. O programa que inclue unha exhibición de embarcacións tradicionais será:

10:00 h Xornada de portas abertas no Meirande. Obradoiros, pasarrúas, posts de comida e bebida todo o día.
12:30 h Exhibición de embarcacións tradicionais no Peirao do Alemán
14:30 h Xantar popular con prezos populares
16:00 h Teatralizacións e visitas guiadas ao Meirande que duraran ata o peche.
19:30 Peche do acto con recreación da Batalla con fogos de artificio.

A Roncadeira, gamela guardesa de vela adaptada

O venres 17 de outubro ás 12:00 vaise presentar no porto da Guarda o Proxecto Gamela Guardesa de Vela Adaptada, co seu magnifico resultado, a Roncadeira, unha gamela guardesa adaptada para que os/as discapacitado/as poidan gozar da navegación nunha embarcación tradicional. No Museo do Mar da Guarda haberá tamén unha exposición sobre o proxecto realizado.

O Proxecto Gamela Guardesa de Vela Adaptada foi promovido polo Concello da Guarda co apoio do GAC 7 e do Club Alagua, e o deseño da embarcación foi feito por 3DNAV. O proxecto non só consiste na construción dunha gamela adaptada, senón tamén preparar as instalacións necesarias na zona da Pasaxe no Miño para que sirva de base á gamela e unha mellora das instalacións do Club Alagua que será o encargado de dinamizar esta embarcación.

Este proxecto é un magnífico exemplo do que é posible acadar creando un novo produto a partir dun barco tradicional para cubrir unha necesidade importante das persoas con discapacidades.

O sitio web do proxecto é de visita obrigada. Non só se pode seguir a construción da gamela senón tamén a xustificación detallada do deseño e unha importante cantidade de boas fotografías e información sobre as gamelas, tanto as guardesas como as coruxeiras.

Parabéns a todos/as os que traballaron neste proxecto, é algo do que estamos seguros se sentirán orgullosos/as.

Seguen as presentacións de Contos do mar de Irlanda

O vindeiro mércores ás 20:00 h na A.C. A Galleira ( San Cosme, nº 1) en Ourense Xurxo Souto fara unha presentación do seu novo libro xunto con Xavier Paz. Tamén están previstas as seguintes presentacións: Xoves 16 de outubro, Ferrol, "Fundaçom Artábria" (Travesa de Batallóns, nº7, Esteiro, Ferrol ) ás 20:00 h; Venres 17 de outubro: Vigo, "Libraría Cartabón" ( Rúa Urzáiz, 125), ás 20:00 h.

Visita á Guarda para coñecer as marcas gráficas dos mariñeiros

A Asociación Galega de Deseñadores (DAG), organiza para o vindeiro día 18 nunha visita á Guarda un encontro coa asociación ANABAM (Asociación Naturista Baixo Miño) para coñecer de preto o singular sistema de marcas gráficas que utilizaban os mariñeiros da Guarda para identificar embarcacións, aparellos... etc.

Consideramos unha moi boa noticia o interese da DAG nas marcas dos mariñeiros da Guarda, polo que vai supor de difusión entre este sector profesional dun elemento senlleiro do patrimonio marítimo galego.

Un autobús sairá da Coruña parando en Santiago, Pontevedra e Vigo para recoller aos interesados en participar. A visita será gratuita para socios da DAG e o custo será de 14 euros para os que non sexan socios da DAG.

O prazo para inscribirse remata este mércores 15. Máis información e datos para inscribirse

Os Contos do Mar de Irlanda chegan á “Croa da Cruña”


O vindeiro mércores 8 de outubro Xurxo Souto presenta o seu novo libro nas Portas Ártabras. No outeiro da Cidade Vella, a carón da ábsida da Igrexa de Santa María, cuxo campanario serviu durante séculos de referencia para todos os mareantes que se achegaban a este porto.

Esta presentación será a primeira da serie “Da Gaiteira a Monte-Alto. A viaxe ao Gran Sol, sen saír da Coruña”, que se desenvolverá nas vindeiras semanas en diferentes puntos da cidade. Nesta celebración da cidade-barco o autor estará acompañado por Manuel Rivas e Felipe Senén. Haberá gaiteiros, cornas e acordeón.

Distribuir contido

A Asemblea da FGCMF decidiu en votación que sexa Cabo da Cruz o porto que acolla o XII Encontro de...
Xa son públicos os materiais das pasadas xornadas Retos e oportunidades para as embarcacións...