Os veciños de Abelleira van botar o seu novo barco o sábado 4 ás 12:30h, ainda que a festa empezará antes cunha comitiva que acompañará á buceta desde o lugar onde foi construida ata o peirao de Sorribos.
Haberá unha exposición fotográfica e proxección dun DVD cos traballos da A.VV. A Ostreira. Logo haberá un xantar.
O acceso con coche ao peirao está prohibido para facilitar a celebración.
A festa vai ser moito máis que unha simple botadura, mirade o programa e o blog dos Mareáns de Abelleira.

No IX Encontro están previstas tres grandes exposicións: unha tratará sobre o Patrimonio Marítimo de Muros e Carnota, outra será Illa de Ons: unha cultura unha identidade, de Staffan Môrling, e por último As embarcacións tradicionais de Lorbé e Ribadeo.
Ademais destas exposicións haberá un pavillón adicado aos museos e tamén terán o seu lugar pequenas exposicións de distintos colectivos.

Mañán polas 07:30h partirán da Ribeira do Chazo, na Illa de Arousa, os tres barcos grandes da ACD Dorna.
Contan con chegar a Muros pola tarde, para poder participar as tripulacións nos actos previos ao IX Encontro.
Nesta travesía participarán a Nova Marina, a Peza de Rabo, e a Irmandiña, que podedes ver na foto de arriba nuha travesía Aldán-Ons.
(Foto tomada do blog da ACD Dorna)

No blog de Lajareu podedes ler un magnífico post sobre unha fermosa iniciativa, recuperar a Ruta das Dornas de Riveira.
As dornas de Riveira, no verán, aproveitaban os ventos dominantes do nordés e noroeste para ir pescar a Monte Louro ou Fisterra.
Este sábado, 4 de xullo, varias dornas de Riveira volverán sair da ría cara Monte Louro e logo a Muros. A saida está prevista para a mañanciña, sobre as 07:00h, de forma que as 11:00h estén fora da ría.
Posiblemente atoparanse cos barcos de Bouzas, outros do sur e a Rabandeira de Vilanova que tamén teñen previsto subir a Muros o mesmo sábado 4.

Por causa do vento o xuíz de regata tomou a dificil decisión de suspender a XXV Volta á Illa o pasado sábado 27.
Ainda que a participación foi de record, 62 dornas, a seguridade dos participantes aconsellou a suspensión.
Máis información no blog de ACD Dorna

Amiga Atlántica acaba de publicar no seu blog Una mirada a la ria de Vigo unha moi boa crónica sobre a botadura do galeón Coruxo, construido pola Escola Taller Mar de Vigo.

Xa están inscritos catro bateis vascos para asistir ao IX Encontro. Veñen de Bermeo, Lekeitio, Ondarroa e Plentzia, e pertencen á asociación Euskal Bateleroak.

Gracias a Juan Álvarez, de Sueste, podemos ofrecervos estas fotos feitas en Ribeira en 1993. Foi o I Encontro.

Os amigos do C.M. Marisma da Ramallosa están a traballar contra o reloxo para ter lista a súa gamela de 20 cuartas para estar en Muros, e que será a primeira da súa tipoloxía en ser recuperada; este tipo de gamelas son propias da zona de Panxón (en Panxón xa só quedan 3 navegando desta tipoloxía) e Baiona, ainda que tamén chegan ata o porto de Canido, o primeiro porto xa dentro da ría de Vigo.