Os vindeiros 3, 4 e 5 de setembro vai ter lugar en Curuxeiras, en Ferrol, a XVIII Parrocheira, organizada polo Club do Mar de Ferrol e que este ano sirve de marco a unha Mostra de Embarcacións Tradicionais, en seco, que forma parte das actividades do Proxecto Dorna. Ademáis coincide co centenario da Autoridade Portuaria Ferrol-San Cibrao.
Segundo o programa haberá unha mostra de 20 barcos en terra, de diferentes tipoloxías para que a xente vexa como son as obras vivas e poida ver con detalle o interior. Tamén haberá unha exposición sobre o Centenario da Autoridade Portuaria, e actividades para os nenos, cunha piscina para navegación e obradoiros infantís.
Por suposto haberá navegación, taberna mariñeira e música ao remate do día. Os interesados en acudir co seu barco que por favor contacten coa Sección de Vela Tradicional do club do Mar indicando datos do barco e número de tripulantes.

Os vindeiros días 27, 28 e 29 de agosto vai ter lugar o XIV Encontro de Embarcacións Tradicionais de Bueu, organizado por Os Galos, e coa colaboración de Bueu Turismo, Museo Massó, Cineclube Bueu e Confraría de Pescadores San Martiño.
Como outros anos o Encontro de Bueu coincide coa Festa do Polbo, que ademais da degustación de polbo, conta cun programa variado.

O programa do XIV Encontro tamén é amplo e variado, con charlas, cine, regatas e botadura dun tiknot.
A organización facilita aloxamento no Pavillón, e comida e cea o día 28.
Os interesados en acudir poden inscribirse gratuitamente no correo galosbueu@yahoo.es ou chamando ao 600 426 086 , indicando os datos do barco e número de tripulantes. É importante facelo o máis pronto posible para facilitar o traballo dos organizadores.

Con motivo do Encontro o Museo Massó organiza o día 28 rutas didacticas en barco pola zona, que incluen o seguimento da navegación das embarcacións tradicionais. As rutas serán a bordo do Chasula, de caracter gratuito, e as prazas son limitadas. É unha boa oportunidade para coñecer e desfrutar do mar de Bueu, e navegar entre as embarcacións tradicionais a bordo dun barco singular.

A FGCMF acaba de participar en Sail and Oar, en Millport, na illa escocesa de Cumbrae. O evento foi organizado por Galgael e Cumbrae Community Development Company, dentro das actividades do Proxecto Dorna en Escocia. Participaron no evento barcos de Escocia, Gales, Irlanda, Pais Vasco e Galicia, e houbo presencia de varios constructores navais escoceses.
A Federación desprazou ata Cumbrae catro barcos (dorna, dorna de tope, buceta e gamela), 6 persoas e material informativo (publicacións, folletos, etc.) Na mesma expedición tamén se transportou o material enviado pola Deputación de Coruña e a Consellería do Mar, socios ambos do Proxecto Dorna, e con presencia no evento.

O bo tempo que tivemos os dous días permitiu que os barcos navegasen sen problemas, sobre todo polas tardes, xa que polas mañáns o vento era frouxo. O pouco vento non afectou ao grande número de barcos escoceses de remo que tiveron oportunidade de bogar en óptimas condicións.
Foron moitas as persoas que se interesaron polos nosos barcos, e que fixeron preguntas sobre como se chamaban, construían, ou patroneaban. Os barcos estiveron fondeados polo que só se podían ver con detalle cando se achegaban a terra para embarcar xente, pero estiveron facendo largos continuamente fronte á praia para que a xente poidese aprecialos. A vela de relinga chamou a atención, sobre todo pola forma de facer a maniobra de virada.

En Cumbrae tamén estaban carpinteiros de ribeira galegos que estaban a visitar estaleiros escoceses dentro dos actos programados no proxecto Dorna, xunto con persoal do COAG, da Consellería do Mar e da Deputación da Coruña.

Dentro do evento presentáronse parte dos traballos do Proxecto Dorna: a base de datos para o inventario de embarcacións e estaleiros, a marca BATE, e as visitas a estaleiros de Galicia, Portugal, País Vasco e Escocia.

Foi unha boa experiencia para todos e esperamos que desta viaxe nazan lazos cos amigos escoceses e irlandeses que propicien intercambios de experiencias e novos encontros.

No blog da ACD Dorna tendes un resume do vivido pola nosa expedición, tamén hai un album de fotos de Francisco Vazquez Grandal, unha crónica do mesmo autor, e outras fotos no album deste sitio web.

O Clube Mariño a A Reiboa e o Concello de Poio organizan a XV Concentración de Embarcacións Tradicionais, en Combarro do 20 ao 22 de Agosto.
Os interesados en acudir co seu barco poden inscribirse neste formulario, ou directamente no correo cmreiboa@gmail.com.
O programa da Concentración inclue a botadura dunha nova dorna de tope, regatas a remos, a Regata da Pamplina e a Volta a Illa de Tambo, entre outras actividades.
Os organizadores aconsellan facer a inscrición o antes posible para poder reservar atraque para os barcos que acudan.

O vindeiro día 7 de agosto vai ter lugar o VII Encontro de Embarcacións Tradicionais de Moaña, organizado pola Asociación Sueste. Este evento enmárcase dentro da VII Semana do Mar, patrocinada polo Concello de Moaña.
Rodeando este Encontro hai unha serie de actividades relacionadas:

Días 4 e 5. Navegación no Eliseo pola ría. A partir das cinco da tarde e dende o peirao da Mosqueira.

Día 6. Charla sobre o patrimonio marítimo galego. Será impartida por Víctor Fernández, Presidente da Federación Galega pola Cultura Marítima e Fluvial. Realizarase no estaleiro de “Carlagho”, as 21,00 horas

Días 12, 13, 14. Portas Abertas no estaleiro de Carlagho. Exposicións fotográficas e de embarcacións tradicionais galegas.

O Eliseo é o galeón que Sueste recuperou, un fermoso barco de 1908 que agora xa ten as súas velas e pode navegar como hai máis de 100 anos.

Programa da Semana do Mar
Carta ás asociacións
Folla de inscrición no VII Encontro

(Foto F. Piñeiro)

Barcas do Minho, xunto co Concello de Monforte organizan o vindeiro 31 de xullo a Festa do Rio, en Monforte, dentro das actividades de Verán no Cabe.
Como noutras edicións, haberá navegación e exposicións relacionadas coa cultura dos rios.

O vindeiro 31 de xullo vai ter lugar o III Encontro en Aldán, coincidindo coas Festas de Aldán, e organizado por Mar da Pedra e a Asociación Cultural Nosa Señora do Carme de Aldán.
O programa inclue información sobre navegacion e sobre as Festas de Aldán.

O vindeiro sábado 17 de xullo ás 20:30 vai ter lugar a I Varada de barcos tradicionais en San Tomé, organizada polo Clube Mariño Salnés.
Logo da navegación na dársena e a varada haberá sardiñada e outras actividades, nas que colaboran a Confraría, a Comisión de Festas de Santa Margarita, a Escola Municipal de Teatro, Os Canheros, e o Obradoiro de Cultura Tradicional “A Volandeira”.

Este é o cartaz do VIII Encontro de Embarcaçoes Tradicionais de Vila do Conde. Anteriormente xa difundíramos o programa previsto para este encontro organizado pola Asociação de Ex-Marinheiros da Armada de Vila do Conde e a Comissão de Festas de S. João de Vila do Conde para os días 18 ao 20 de xuño.

A Asociação de Ex-Marinheiros da Armada de Vila do Conde e a Comissão de Festas de S. João de Vila do Conde organizan do 18 ao 20 de xuño o VIII Encontro de Embarcaçoes Tradicionais de Vila do Conde que conta cun completo programa.
Os interesados en asistir cos seus barcos deben preencher a ficha de inscrición e enviala por email ou carta antes do 31 de maio.