Acaba de sair o novo volume da Revista de Estudos Miñoranos, correspondente aos números 7/8/9 e que entre outros inclue dous interesantes artigos: Intervención arqueolóxica subacuática, ampliación do peirao de porto de Baiona, Pontevedra de Miguel San Claudio Santa Cruz e Raúl González Gallero, e Notas etnohistóricas sobre o aproveitamento do argazo na costa suroeste de Pontevedra (de Silleiro ao Miño) de Roberto Rodríguez Álvarez.

Dentro da súa serie Profesionaliza a túa lingua o Servizo de Normalización Lingüistica da Universidade da Coruña publicou hai xa algún tempo a obra Construcción naval. Recolle termos en español acompañados da sua tradución ao galego e a súa definición.

O Amigos da Dorna de Portonovo acaban de sacar o número 8 de O Cabeso, o seu voceiro, que pode ser baixado en pdf na súa páxina.
Neste número pasan revista ás súas actividades no 2009: participación no Enterro da Sardiña e na Festa da Raia, organización da II Regata do Sepelo, participación en concentracións de embarcacións tradicionais e no IX Encontro, e participación nas regatas de dornas.
Tamén informan das negociacións con Portos de Galicia para lograr a cesión do Local da Bomba en Portonovo para sede da Asociación. Estas negociacións parecen ir por bo camiño e é posible que pronto den froito.

O pasado día 14 presentouse a bordo do Hidria II en Vigo o libro La ría de Vigo y su puerto, do fotógrafo Ricardo Grobas, con textos de Edurne Baines.
Este libro editado pola Autoridade Portuaria de Vigo recolle nas súas 241 páxinas un conxunto de fotografías que nos dan unha visión moi completa da relación de Vigo co mar, da construción naval á presencia dos grandes cruceiros, da carpintería de ribeira aos surfeiros, da lonxa aos faros, case calquer aspecto do mar está presente nesta obra.
A calidade das fotografias é sinxelamente espectacular, como poderedes ver na versión en liña do libro. Agradecemos moito ao autor que comparta con todos estas fotografías a través da Rede.
A foto de arriba, tirada do libro é o regreso a porto das mariscadoras de Arcade logo dunha xornada de traballo.
Máis información no Faro de Vigo
(Via Una mirada a la ría de Vigo)

Os amigos de Barcas do Minho produciron o xogo de ordenador A conquista dos rios que axuda a poñer en valor o patrimonio tanto natural como cultural dos rios. Deste xogo existe versión en liña e en CD.

No número 5 da revista Galegos publícase unha entrevista con Pepe Garrido. A familia Garrido construe barcos no Grove desde hai 150 anos, cinco xeracións, e do seu taller teñen saido barcos tan coñecidos como a dorna Meca, a Irmandiña, a Sara, e moitos outros.
Acompaña a esta entrevista un artigo de Manuel Lara, presidente de Buxa, sobre a carpintería de ribeira galega.

O pasado 31 de outubro presentouse no CN San Vicente o libro La vida bajo la quilla. Fauna y flora marina de las Islas Atlánticas con fotos de Rafael Sanmartín Lois e texto de José Luis Escalante González, editado por Todogrove Edicións.
O libro consta de 350 fotografías submarinas de fauna e flora documentadas con profusión, con datos científicos de cada especie. Está xa á venda nas librarías de toda Galicia.

A Asociación O Faiado da Memoria e o Arquivo da Memoria Social de Vilagarcía de Arousa, estan a levar adiante un máis que interesante traballo de recuperación e sobre todo difusión de todo tipo de documentos e testemuños sobre o pasado de Vilagarcia, e tamén doutras poboación próximas.
Non se trata dun simple arquivo de material gráfico ou sonoro, senón que hai detras un traballo de contacto e colaboración coas persoas que poseen os documentos ou as lembranzas e por tanto poden aportar algo.
Este material é conservado para un uso público por parte de calquera interesado, e parte deste material é difundido por internet, dando lugar a que sexa enriquecido polos comentarios de persoas que teñen información sobre as noticias ou os documentos difundidos.
Como exemplo da calidade e interese dos materiais podedes ver o video de arriba con imaxes de varios tipos de embarcacións da Ría de Arousa a principios do século XX.
Recomendamos unha visita demorada e atenta, sobre todo aos comentarios que aparecen en moitos dos documentos ou artigos.
(Vía blog ACD Dorna)

Xurxo Gago, Axena e Manuel Gago ofrecennos unha serie de minipelículas sobre a vida de peixes e mariscos que habitualmente consumimos e que están rodadas na ría de Arousa valéndose dunha cámara metida nunha bolsa estanca.
Este primeiro capítulo está adicado á ameixa fina.
(Vía Capítulo0)

De onde ven a palabra Esteiro? Neste interesante blog, Arqueotoponimia, atoparedes unha explicación para este nome. Tamén son moi interesantes os documentos que enlaza neste post a autora, que agocha o seu nome baixo un seudónimo, Andregoto Galíndez.